كوردستان و ايران

كوردستان‌و كورد: پێش نیوه‌رۆی‌ رۆژی‌ یه‌كشه‌ممه‌ 21/5/86 له‌ كاتێك دا كه‌ ماشێنێكی‌ باری‌ هه‌ڵگری‌ به‌نزین‌و گازوئیل كه‌ 3 نه‌فه‌ر سه‌رنشینی‌ تێدا ده‌بێ‌ له‌ به‌ر پۆستی‌ بازره‌سیی‌ به‌ر گوندی‌ سه‌به‌تڵووی‌ بانه‌ ده‌كه‌وێته‌ به‌ر ده‌ستڕێژی‌ هێزه‌كانی‌ رێژیم

و له‌ ئاكامدا سێ‌ كه‌س له‌ سه‌رنشینه‌كانی‌ ماشێنه‌كه‌ به‌ ناوه‌كانی‌: 1ـ ئه‌بووبه‌كر كوڕی‌ ره‌شه‌ خوله‌ی‌ هه‌نجیله‌‌و 2ـ رئووف خه‌ڵكی‌ گوندی‌ كه‌ریم ئاوای‌ ناوچه‌ی‌ بابۆس 3ـ عه‌لی‌ خه‌ڵكی‌ ناوچه‌ی‌ بانه‌ ده‌سووتێن‌و گیان له‌ده‌ست ده‌ده‌ن.
خه‌ڵكی‌ گوندی‌ سه‌به‌تڵووو گونده‌كانی‌ ده‌وروبه‌ر دوای‌ روودانی‌ ئه‌م كاره‌ساته‌ به‌ داروبه‌رد هێرش ده‌كه‌نه‌ سه‌ر پۆستی‌ بازره‌سی‌‌و ده‌یسوتێنن‌و به‌ره‌و پاسگگای‌ رێگره‌كانی‌ رێژیم ده‌چن‌و ده‌وروبه‌ری‌ پاسگاكه‌ ده‌سوتینن. هێزه‌كانی‌ رێژیم له‌ بانه‌وه‌ به‌ یارمه‌تیی‌ هێزه‌كانیان له‌و پاسگایه‌ ده‌چن‌و تێكهه‌ڵچوونێكی‌ توند ده‌ست پێ‌ ده‌كا، به‌ شێوه‌یه‌ك كه‌ رێژیم له‌ شاری‌ سه‌قزیشه‌وه‌ 5 ماشێنی‌ پڕ له‌ هێزه‌ به‌كرێگیراوه‌كانی‌ ده‌نێرێته‌ یارمه‌تیی‌ هێزه‌كانی‌ له‌ سه‌به‌تڵوو. له‌ ئاكامی‌ هێرشی‌ خه‌ڵك بۆ سه‌ر هێزه‌كانی‌ رێژیم‌و پاسگاكه‌ی‌ له‌ گوندی‌ سه‌به‌تڵوو ئوستوارێكی‌ رێژیم بریندار بووه‌‌و 3 ماشێنی‌ پاسگا‌و مۆتۆرێكی‌ به‌رق‌و 3 كانتینه‌ر سوتاون.

شایانی‌ باسه‌ كه‌ له‌ ته‌واوی‌ ماوه‌ی‌ ده‌رگیرییه‌كه‌دا رێژیم له‌ هه‌ر دوو لاوه‌ واته‌ هه‌م له‌ لای‌ سه‌قزه‌وه‌‌و هه‌م له‌ لای‌ بانه‌وه‌ جاده‌ی‌ به‌ستبوو‌و تا كاتژمێر 5ی‌ ئێواره‌ هه‌ر چه‌شنه‌ هاتوچۆیه‌كی‌ به‌م جاده‌یه‌دا قه‌ده‌غه‌ كردبوو.

	كوردستان و ايران
	تازه ترين اخبار ايران وكوردستان