بۆ یه‌که‌مجار له‌ئاستێکی باڵادا کاربه‌ده‌ستانی ئێرانی دانیان به‌تاوانی میکۆنۆس و ده‌رئه‌نجام و بنبه‌سته‌ دیپلۆماسییه‌ی پاش رووداوه‌که‌ دانا.
سه‌یید حه‌سه‌ن موسه‌ویان که‌ له‌کاتی روداوی میکۆنۆسدا باڵوێزی ئێران بووه‌ له‌ئه‌ڵمانیا، به‌م دواییانه‌ کتێبێکی نووسیوه‌ به‌ناوی "ناکۆکییه‌کانی په‌یوه‌ندیی نێوان ئێران و رۆژئاوا، لێکدانه‌وه‌ی په‌یوه‌ندی ئێران و ئه‌ڵمانیا (له‌یه‌کێتیی نێوان دوو ئه‌ڵمانیاوه‌ تا قه‌یرانی میکۆنۆس)"، که‌ له‌لایه‌ن ناوه‌ندی لێکۆڵینه‌وه‌ی ستراتیژی جڤاتی ده‌ستنیشانکردنی به‌رژه‌وه‌ندییه‌کانی سیسته‌م سه‌ر به‌هاشمی ره‌فسه‌نجانی چاپ و بڵاو بۆته‌وه‌. کتێبه‌که‌ 339 لاپه‌ڕه‌یه‌ و هاشمی ره‌فسه‌نجانیش پێشه‌کی بۆ نوسیوه‌.
نووسه‌ری کتێب پاش باسکردنی ورده‌کارییه‌کانی روداوه‌که‌، شاهیده‌کان و بڕیاری دادگا و که‌شوهه‌وای سیاسی و نامه‌گۆڕینه‌وه‌ی "هلمۆت کهۆل" و ئه‌کبه‌ری ره‌فسه‌نجانی له‌پێناو به‌رگری کردن له‌و قه‌یرانانه‌، دێته‌ سه‌ر باسی چۆنیه‌تی روداوه‌که‌.
به‌گوێره‌ی لێکدانه‌وه‌یه‌کی سایتی بی بی سی، ئه‌م به‌شه‌ی کتێب ئه‌گه‌رچی شتێکی تازه‌ نییه‌ و دوای تێپه‌ڕبوونی زیاتر له‌ده‌ ساڵ شتێکی تازه‌ ناداته‌ خوێنه‌ر، به‌ڵام له‌وانه‌یه‌ یه‌که‌مین جار بێت له‌لایه‌ن کاربه‌ده‌ستێکی ره‌سمی ئێرانه‌وه‌ که‌ به‌هۆی به‌رپرسیارێتیه‌که‌یه‌وه‌ له‌نزیکه‌وه‌ هه‌ستی به‌روداوه‌کان کردوه‌، ده‌نوسرێت و کۆده‌کرێته‌وه‌.
نووسه‌ری کتێب ده‌ڵێت که‌ دادگاییکردنی تاوانباران له‌لایه‌ن کاربه‌ده‌ستانی دادگای ئه‌ڵمانیا له‌ساڵی 1993دا ده‌ستی پێکرد. ساڵێک پاش ئه‌مه‌ "دادگاکه‌ گه‌یشته‌ ئاستێک که‌ راسته‌وخۆ کاریگه‌ریی خراپی له‌سه‌ر په‌یوه‌ندیی نێوان ئێران و ئه‌ڵمانیا دانا. رۆژی هه‌ینی 16ی مارس دادوه‌ری دادگای ئه‌ڵمانیا له‌به‌رلین بانگهێشتنامه‌یه‌کی بۆ عه‌لی فه‌لاحیان نارد که‌ له‌ساڵی 1989وه‌ وه‌زیری ئیتلاعاتی ئێران بوو و وه‌ک گومانلێکراوێک داوای لێکرد که‌ له‌دادگا ئاماده‌ بێت."
شایانی باسه‌ ساڵی 1371 له‌رێستۆرانتی میکۆنۆس چوار که‌س له‌دژبه‌رانی ئێران و له‌ناویاندا سکرتێری حزبی دیموکراتی کوردستانی ئێران د. سادقی شه‌ره‌فکه‌ندی له‌لایه‌ن ئێرانه‌وه‌ تیرۆر کران و به‌دوای ئه‌م روداوه‌شدا، په‌یوه‌ندی نێوان ئێران و وڵاتانی ئه‌وروپا به‌گشتی تاریکترین قۆناخی به‌خۆیه‌وه‌ بینی.

ده‌قی بابه‌ته‌که‌ به‌ فارسی له‌ سایتی bbc

http://www.bbc.co.uk/persian/arts/story/2006/10/061028_fb_fm_mikonos.shtml